خِدْني عا جْناحَكْ يا طَيْرْ الطّايرْ وْرُوحْ
تا عَيّدْ سُلْطان قَلْبي و مَلِكْ الرّوحْ
وْ ضَوّيلو شموعْ منْ وَهِجْ وْ لَهيبْ الروحْ
خِدْني تا بَلْسِمْ جُرْحْ عَميقْ بَعْدو مَفْتوحْ
تا إسْقيه كاسْ منْ دمْ الْوَريد الْمَجْروحْ
خِدْني تا خَبْرو عَنْ حُبّي وْ عِشْقي اللّي صارْ مَفْضوحْ
عنْ شَوْقي وْ حَنيني ،عنْ لهيبي ،عنْ الْتهاب الْجُروحْ
خدْني يا طَيْرْ دَخيلَكْ ،خِدْني تا قِلّو
انْتْ وَحيي ،إنْتْ إبِنْ احلامي ،انْتْ الطُموحْ
إنْتْ مَلاذي ،إنْتْ مَرَضي ،إنْتْ شَغَفي الْمَطْروحْ
إنْتْ أمَلي ،رَحيقْ قَلْبي ،عِطرْ روحي ،إنْتْ وَحْدَكْ الْمَمْدوحْ
خِدْني يا طَيْرْ دَخيلَكْ ،خِدْني تا قِلّو
مَطْرَحَكْ بخَلايا الْقَلْب دافي ،بِهَيْكَلْ الرّوحْ
ما حدا بِحلّ مَحَلّو ،لا..لا..مِشْ مَسْموحْ
خِدْني يا طَيْرْ دَخيلَكْ ،خِدْني تا قِلّو
إنْتْ وَحْدَكْ خَلَّيْتْ جِسْمي خادم مُطيعْ للروحْ
جايي لْعِنْدَكْ تا نِبْني سَوا بالهوى صْروحْ
خِدْني بْسرْعَة يا طَيْرْ ،خِدْني تا قِلّو
بالْحُبْ ما في مَمْنوعْ ،كِلّو مْحَلَّلْ وْ مَسْموحْ
ومِنْ عِنْدَكْ ما بَدّي روحْ لَوْ بِتْروحْ الروحْ
وْعَقْبالْ مَلْيون سِني وإنْتَ بِقَلْبي الْبَدِرْ يا روح الروح
وحاجي بقا يا قَلْبي منْ الْهَوى تِبْكي وْتْنوحْ
رامونا مخلوف شدياق
