بنوعى الفجر عَ مهلنا بكّير،
قبل الشّمس ما تزور ل "حْواكير"..
بنغدي عَدرب الشّغل مبسوطين،
ويكرُج عَرقنا وينعِقِدْ الجبين!
وتمرّ ساعة وخلفها ساعة،
تنده بِصوتا هاك البيّاعة..
ويجاوبا فلّاح بكروم الدّني،
عم يِزرع ويحصُد بِعمر الولدنِة..
ويوصل صدى صوتا لِ خيّاطة،
عم تدرُز فساتين ع ضوّ السرّاج..
وتُقبض بدالا شويّة "فراطة"!
ننطُر عبابْ الصّبح بيّاعة حليب،
بتوزّع الغلّة على بعيد وقريب..
وسكّاف لِمْ يطرق على السّندان،
نغمِة وتر عم تعزُف الألحانْ..
إستاذ عم يشرح لطلّابو،
ويقرالهن أحكام بكتابو:
إنّو العمل بيشرِّف الإنسان،
بيكبر عإيدو ويعمر البنيان..
وكلّ ما رفع مدماك ببيوت الحياة،
بتصير أيامو فراح تزيد..
وكلّ لحظاتو سعادة وعيد!
"رندة رفعت شرارة"
تحية لكل عامل وعاملة هذا اليوم وكل يوم
**
الحاكورة : أرض تُخصص للزراعة حولَ الدُّور
فراطة: القِطع النقدية الصغيرة :- فُراطة نقد .
