يا جنوب؛ يا معتّز بجناحين
ما في جناح بموقفو إستجنّب
شعبك شعب بالعلم رجَّح عين
لا تأمرك بطبعو ولا تأجنب
ولمّا عليك الحرب فتّح عين
إستأسد ع خط النار ما تأرنّب
بالشب شفنا بطش بو السبطين
بالبنت شفنا عاطفة زينب
يا إبن عامل كل ما بتشيخ
كل ما الصبا بتضلّ عملاقو
مش بس كتفك دقّ بالمريخ
المريخ صوبك شرَّع طواقو
وكل شي الحرب ودٓتلك صواريخ
حصان الوعد ما طلّق سباقو
ومطرح ما إسمك مرّ بالتاريخ
عطر الشرف دلدقمن وراقو
ما بقول عنك ضيغم بغابك
الضيغم بيوم الحدّ بيهابك
ما بشبّه عصابك بلون الوجد
لون الوجد أصلو من عصابك
كنفّك متل واحة بصحرة نجد
قرش الحلال بتعشقو جيابك
مدلوق عا تيابك عبير المجد
بهنّي عبير المجد بتيابك
وحدك درع لجنوبك الحسّاس
والفجر من خلف الدرع لامع
وكبر الزمان بمدبحك شمّاس
وسع الفضا بمواقفك سامع
صيتك متل صيت الندي بينقاس
لالا الندّي بمحبتك طامع
بترّتل القرآن بالقدّاس
بنكبّر الإنجيل بالجامع
