قانا الجريحة من العنق للخصر
لوّنت رايتها بدمّاتك
وكيف الخضر سيّج عفاف القصر
سيّجتها بجانح بطولاتك
وفكيّت عن قرنون قيد الحصر
بوقفات صوره عن كبر عن كبر ذاتك
وإنت ما بتعتاز كاس النصر
كاس النصر معتاز وقفاتك
الله معك يا محطّم الأصنام
وسهران عا أمجاد أجدادك
تعطي ما تستعطي من الأيام
تمهل ما تهمل جرم حسّادك
سلاحك سيوف مأنسني وقلام
ومنقول عن خبز السما زادك
بتسهر تا غيرك عا الحرير ينام
بتجوع حتى تطعم بلادك
جينا تلاته وما رضينا شريك
كنيسه وخلوه وميدنه نحييك
نشمّ المسك من ريحة دروبك
نستلهم ملاحم من لياليك
نلاقيك يا راجع من غروبك
بصوت القصيدة مش بصوت الديك
اكتر ما إنت كبرت بجنوبك
جنوبك ولبنان كبرو فيك
من جنوب منبت عز مهد عقول
تجسّد عتيقو بعالم جديدك
طليّت عا المجهول عا المعقول
تشرقّن الغرب تقرّب بعيدك
تكرِّم الحب بشعر مش منقول
اكتر ما كرّمت الحلا بعيدك
وجبرت روّاد القصيد تقول
خلقت تعطي أرضك من القلب
ما خلقت تعطي الأرض من إيدك
