فقير ان كنت عا شقفة حصيري
ماعندي من غنايا المال غيري
انا ما همني ليرات اجمع
انا البيهمني مريح ضميري
صحيح الفقر صعب بكل موضع
الدهر مرات بظروفو العسيري
بخللي ثعلب الأيام يطمع
وعا ناب السبع يحكي الف سيري
وطير البوم ساعة ما بيشبع
بصيرو جوانحو طابع اميري
بس النسر ساعة ما بيدمع
بيقولو جوانحو للنسر عيري
الفقر مش عيب بس العيب نجمع
ثروه مكدسه ونوقع بحيري
وما نخلي فقير رغيف يشبع
وبدل ما نساعدو بساعه مريري
نروح ونتركو وما نعود نسمع
تا ما تنقص الثروه الكبيرة
يا عشاق الحياة بكل مجمع
اسمعوني قبل ما قرر مصيري
انا بحب التواضع بس بقنع
لأنو اللي بيحمل عقل كامل
شو همو ان كانت جيابو فقيري
