لبنان يا غنية العرزال
وصنين والنايات والشادي
والأرز عم يشمخ عا أعلى جبال
ومنجيرة الرعيان بالوادي
لبنان أستقلالك بينشال
بقلوبنا للدهر زوادي
لبنان يا نقلة طيور حجال
ونسمة ربيع كتير متمادي
ربوعك الخضرا للطبيعه شال
رجالك بوقفة عز بتنادي
والشمس منك آخذي مرسال
والبدر عا روابيك بيدادي
لبنان أستقلالك بينقال
أجمل قصيدة بجوك الهادي
جيشك الباسل هيبتو بالبال
بيضل قد الحمل وزيادي
وشعارك لبيرندحو الموال
بكم ردة معنى وقرادي
.... ندى عياش صادق
